Tal e como estaba previsto, Motorola anunciou hoxe novidades do seu portfolio de dispositivos. Tras semanas de rumores e filtracións, os novos Motorola Edge 50 son oficiais. Son tres teléfonos que chegan para dar a batalla en tres segmentos de prezo ben diferenciados.
Os Motorola Edge 50 Fusion, Edge 50 Pro e Edge 50 Ultra comparten pantalla curva pOLED de 6,7 polgadas, aínda que con diferentes características. Tamén son diferentes en canto á folla de especificacións que levan, coincidindo -en parte- nas liñas de deseño.
| Motorola Edge 50 Fusion | Motorola Edge 50 Pro | Motorola Edge 50 Ultra | |
|---|---|---|---|
| Pantalla | 6,7 polgadas FullHD+ 144 Hz 1600 nits de brillo HDR10+ | 6,7 polgadas 2.712 x 1.220 píxeles 144 Hz 2.000 nits HDR10+ | 6,7 polgadas 2.712 x 1.220 píxeles 144 Hz 2.500 nits HDR10+ |
| Dimensións e peso | 161,9 x 73,1 x 7,9 mm 174,9 g | 161,23 x 72,4 x 8,19 mm 186 g | 161,09 x 72,38 x 8,59 mm 197 g |
| Procesador | Qualcomm Snapdragon 7s Gen 2 | Qualcomm Snapdragon 7 Gen 3 | Qualcomm Snapdragon 8s Gen 3 |
| RAM | 8 / 12 GB | 12 GB | 12 / 16 GB |
| Memoria interna | 128 / 256 / 512 GB | 512 GB | 512 GB / 1TB |
| Cámara principal | Principal: 50 MP, f/1.88, OIS Gran angular: 13 MP, f/2.2, 120º, macro | Principal: 50 MP, f/1.4, OIS Gran angular: 13 MP, f/2.2, 120º Telefoto: 10 MP, f/2.0, 3x, OIS | Principal: 50 MP, f/1.6, OIS Gran angular: 50 MP, f/2.0, 120º, macro Telefoto: 64 MP, f/2.4, 3x, OIS |
| Cámara dianteira | 32 MP, f/2.45 | 50 MP, f/1.9 | 50 MP, f/1.9 |
| Batería | 5.000 mAh Carga rápida 68 W | 4.500 mAh Carga rápida 125 W Carga sen fíos 50 W Carga sen fíos inversa: 10 W | 4.500 mAh Carga rápida 125 W Carga sen fíos 50 W Carga sen fíos inversa: 10 W |
| Sistema operativo | Android 14 | Android 14 | Android 14 |
| Conectividade | 5G WiFi Bluetooth 5.2 NFC USB-C 2.0 | 5G WiFi 6E Bluetooth 5.4 NFC USB-C 3.1 DisplayPort 1.4 | 5G WiFi 7 Bluetooth 5.4 NFC USB-C 3.1 DisplayPort 1.4 |
| Outros | Altofalante dobre Dolby Atmos IP68 Lector de pegadas baixo pantalla | Altofalante dobre Dolby Atmos IP68 Lector de pegadas baixo pantalla | Altofalante dobre Dolby Atmos IP68 Lector de pegadas baixo pantalla |
| Prezo | Desde 349 euros | 699 euros | Desde 999 euros |
Como pode extraerse da táboa anterior, os tres modelos comparten pantalla de 6,7 polgadas, con taxa de refresco de 144 Hz, o que resulta especialmente interesante para as persoas que empregan os seus dispositivos para xogar. Son compatíbeis con HDR10+ e ofrecen un bo nivel de brillo, aínda que diferente: 1600 nits no Fusion, 2000 nits no Pro e 2500 no Ultra.
Difiren tamén no procesador escollido, e na configuración de memorias. Así, o Edge 50 Fusion ofrece 8 ou 12 GB de RAM combinábeis con 128, 256 ou 512 GB de memoria. O Edge 50 Pro comercialízase nunha única configuración de 12 + 512 GB, e o Edge 50 Ultra sube a aposta até os 12 ou 16 GB de RAM con 512 GB ou 1 TB de memoria interna.
No apartado fotográfico, o modelo máis básico ofrece unha configuración de dobre cámara (principal + gran angular), á que se suma un sensor telefoto nos Edge 50 Pro e Ultra. No que ten a ver coa batería, o Fusion vén con 5000 mAh e carga de 68 W, fronte os dous modelos máis avanzados, que reducen a capacidade a 4.500 mAh a cambio de integrar carga de 125 W mediante cable e de 50 W a través da carga sen fíos. Como curiosidade, todos eles inclúen o cargador na caixa.
Por suposto, os tres modelos veñen equipados de conectividade 5G e NFC para pagos móbiles, ademais de lector de pegadas dixitais baixo a pantalla e protección IP68. Atopamos diferenzas na WiFi soportada, con WiFI 6E no Edge 50 pro e WiFi 7 no Edge 50 Ultra. Ademais, estes dous modelos tamén ofrecen funcionalidades DisplayPort no USB-C.
Dispoñibilidade e prezo
Os tres modelos van poder adquirirse a través da páxina web de Motorola, así como tamén na rede de distribución habitual da marca e nalgúns operadores. Polos Motorola Edge 50 Ultra e Motorola 50 Fusion aínda haberá que agardar unhas semanas, mais o fabricante adiantou o prezo de partida, que será de 999 €e 399 €, respectivamente.
O Motorola Edge 50 Ultra estará dispoñíbel nos tons Forest Grey, Nordic Wood e Pantone Peach Buzz, mentres que o Motorola Edge 50 Fusion chegará en Forest Blue, Hot Pink e Marshmallow Blue.
Pola súa banda, o Motorola Edge 50 Pro sae hoxe á venda na web de Motorola por 699 €, nos tons Black Beuty, Moonlight Pearl e Luxe Lavender. Como promoción exclusiva de lanzamento, mercándoo a través de Motorola, Orange, Vodafone, Telefónica, Yoigo, Amazon, Media Markt, PC Componentes ou na tenda online de Alcampo antes do 31 de maio, as usuarias levarán de regalo uns auriculares Moto Buds+, que teñen un prezo recomendado de 59 euros.
