Adoito dicirvos en moitas ocasións iso de que xa había tempo que tiña gana de facer a receita da que vos falo. Mais nesta ocasión non foi así. E todo por causa dos amigos e amigas de Quinteiro Doce. Puxéronme de deberes pensar nunha receita para facer coas súas especias. Tocaba discurrir! E xa vos confeso que a inspiración non chegaba. Así que o día que me preguntaron que ía preparar, para mandarme as especias, saiume de non sei onde: polo Tikka Masala. E por que? Quen o sabe. Aí estaría gardado na miña cabeza a saber desde cando. O caso é que é unha receita moi sinxela, como a min me gustan. Con ingredientes ben doados e un resultado de vicio!
O polo maríñase durante unhas horas ou toda a noite. E iso fai que a carne quede taaan tenra e cun sabor tan suave, que ha gustar ata a quen non adoita gostar do polo. O prebe e as especias son as que dan carácter a esta receita. E aínda que pareza que leva moitas (e si, leva abondo), o seu sabor é harmonioso e equilibrado. Por suposto que se non comedes polo, tamén se pode facer con tofu ou seitán. E queda igual de sabedeiro.
Para aproveitar esa marabilla de prebe, un arroz basmati é o ideal. E se queredes acompañalo tamén cun pouco pan de pita para remollar, quen son eu para dicirvos que non? Como veredes nos ingredientes, o picante é opcional. De feito, eu fíxeno sen el. Todas as especias que saen na receita podedes mercalas no comercio local galego, que é onde poderedes atopar os produtos de Quinteiro Doce.
Print
Ingredientes
- Para o mariñado do polo
800 gramos de sobrecoxas sen pel, sen oso e cortadas en anacos de trabada
230 gramos de iogur
1 cullerada e 1/2 de allo en po
2 culleradiñas de garam masala
1 culleradiña de: cúrcuma, xenxibre en po, comiño moído, pemento doce e sal
1/2 culleradiña de pemento picante (opcional)
- Para o prebe
2 culleradas de aceite de xirasol
2 culleradas de manteiga
2 cebolas pequenas ou 1 grande
1 cullerada e 1/2 de: allo en po, garam masala e comiño moído.
1 cullerada de: xenxibre en po, cúrcuma, pemento doce, pemento pincante (opcional), sal e azucre moreno.
400 gramos de passata ou puré de tomate
300 ml de nata para cociñar
coandro fresco para decorar
Arros basmati cocido e pan de pita (opcional)
Preparación
- A noite anterior, preparamos o polo. Temos que sacarlle a pel, o óso e cortalo en anacos pequenos.
- Nun cunco, botamos o iogur e as especias e remexemos todo ben.
- Engadimos o polo, mesturamos e tapamos. Deixamos que repouse na neveira ata o día seguinte. Se non tedes tanto tempo, deixádeo mínimo 10 minutos.
- Ao día seguinte, sacamos o polo da neveira e fritímolo. Convén fritilo en dúas veces para que se faga mellor. Botamos unha cullerada de aceite de xirasol e fritimos a metade. Reservamos. Despois botamos outra cullerada e fritimos a outra metade. Reservamos mentres preparamos o prebe. Aquí o importante é que o polo quede dourardiño, pois xa se rematará de cociñar co prebe.
- Na mesma tixola, engadimos as dúas culleradas de manteiga e deixamos que se derreta.
- Cortamos a cebola en anacos pequenos e engadímola. Deixamos que se cociñe uns minutos a lume medio-baixo.
- A continuación, engadimos todas as especias agás os pementos (doce e picante). Remexemos ben e fritimos un minutiño.
- Botamos a passata ou puré de tomate xunto cos pementos e mesturamos. Deixamos que faga chup chup a lume baixo durante uns 10-15 minutos ou ata que vexades que o prebe colleu unha cor marrón escura.
- Botamos entón o azucre moreno e a nata, mesturando todo ara que teña unha cor uniforme.
- Engadimos o polo e deixamos que se cociñe durante uns 10 minutiños máis.
O polo tikka masala xa o teriamos preparado. Agora só queda acompañalo co arroz basmati e o pan de pita. E botarlle un chisco de coandro fresco picado por riba. Como vedes, é unha receita que dá pouco que fregar porque se fai todo nunha mesma tixola. Os acompañamentos poden variar. Nós fixémolo só con arroz basmati. O que máis me sorprendeu é o tenro que queda o polo grazas ao mariñado de iogur. O prebe queda suave e aínda que non sexades moito de especias, non é un sabor súper forte. Eu recoméndovos probalo 100% pois é unha receita sinxela, rápida e cun excelente resultado.
