O 10 de febreiro de 2024 comezan os festexos do novo ano lunar. E como en case todas as celebracións, a comida tamén é protagonista. E aínda que se festexa en moitos países, na China é onde esta festa é máis recoñecida a nivel mundial. Este ano, por se non o sabiades, é o ano do dragón. E isto que siginifica? Pois que nos agarda un ano de éxito, sabedoría e boa sorte.
Todo no ano novo lunar está cargado de simboloxía. E isto tamén se pode apreciar na comida que se prepara durante os días que dura a festividade. Os jiaozi, tamén chamados empanadiñas ou dumplings chineses, sempre están presentes por tres boas razóns. A primeira, porque están boísimos. A segunda, porque a súa pronuncia ten certo parecido co termo empregado antigamente para referirse ao cambio de algo vello por algo novo. E a terceira, porque a súa forma recorda aos lingotes de ouro. Polo tanto, un prato cheo de jiaozi semella un prato cheo de lingotes, o que simboliza a riqueza que nos agarda no novo ano.
Neste blogue xa fixeramos as gyozas xaponesas, que non deixan de ser o mesmo co nome en xaponés. Fixerámolas de carne e por iso os jiaozi os fixemos de gambas. Os ingredientes como o bambú, o mollo de ostras, o viño de arroz, o amidón de mandioca e as masas mercámolos todos na tenda de produtos asiáticos Asian Market, na rúa de Santiago del Estero, 5, en Compostela.
Print
Ingredientes para uns 24 jiaozis
200 gramos de gambas peladas, desconxeladas
35 gramos de bambú en conserva
1 cullerada de amidón de tapioca
1 culleradiña de salsa de ostras
1 culleradiña de mollo de soia
1 culleradiña de aceite de sésamo
2 culleradiñas de viño de arroz
1 belisco de azucre
1 chisco de pementa negra
24 masiñas para jiaozi (receita aquí)
- Para a base crocante
70 ml de auga
1 culleradiña de fariña triga
1 culleradiña e 1/2 de amidón de millo
1 pouquiño de sal
Preparación
- Comezamos fervendo durante dous minutiños os rebentos de bambú en conserva para sacarlles o sabor máis amargo. Deixámolos arrefriar un pouco, secámolos e picámolos.
- Picamos as gambas.
- E mesturamos as gambas picas e o bambú xunto co resto dos ingredientes, agás as masas.
- Tapamos pegándoo ben á mestura e deixamos repousar na neveira durante, mínimo, uns 20 minutos. Podemos deixalo ata dous días.
- Collemos unha masiña, poñemos unha culleradiña de recheo e pechamos como máis nos guste. Tedes unha explicación mellor, na receita das gyozas, aquí.
- Agora podemos facelas ao vapor, fritilas e despois cociñalas con auga ao vapor, ou ben deste outro xeito que vos vou mostrar.
- O que imos facer é unha base crocante que una todos os jiaozis 🙂 É un xeito moi orixinal de presentalos, engade un extra de crocante, que sempre queda ben, e está moi bo. Para iso, poñemos uns 10 ou 11 jiaozis na tixola, como formando un círculo, cun pouco de aceite.
- Deixamos que se fritan e cando a base fique douradiña, mesturamos os ingredientes que tedes arriba da base crocante e botámolos. (Se vedes que a tixola é moi grande, dobrade a cantidade de ingredientes da base).
- Tapamos a tixola durante uns 5 ou 6 minutos a lume medio. Destapamos e deixamos que a base vaia ficando crocante e se vaia despegando lixeiramente das paredes da tixola.
- Collemos un prato e dámoslle a volta como se fose unha tortilla. E xa estarían no seu punto.
O resto podémolas facer fritidas, cun pouco de aceite, e despois botamos un canequiño de auga, tapamos e deixamos que se fagan ao vapor durante uns 5 ou 6 minutos a lume medio. Voltamos abrir a tapa e deixámolas un minutiño. Tamén se poden facer nunha vaporeira ao vapor. Saberemos que están no seu punto cando vexamos que a masa cambia lixeiramente de cor, ten máis brillo e o jiaozi está máis gordiño.
Agora só queda desfrutar. A verdade non precisan un mollo porque xa levan moito sabor por dentro. E se queredes unha versión con carne de porco, probade a facer as gyozas. E non vos preocupedes se vos custa dobralas, hai milleiros de xeitos de facelo e de seguro que atoparedes un que se vos dará de marabilla.
